ከ ESCFE ሥራ አስፈጻሚ ኮሚቴ የተሰጠ መግለጫ

21ኛው የኢትዮጵያውያን ስፖርትና ባህል ፌስቲቫል ባሳለፍነው ሳምንት በሮም ከተማ መካሄዱ ይታወቃል። በየዓመቱ በጉጉት የሚጠበቀውና በአውሮፓ ውስጥ ለኢትዮጵያውያንና ለትውልደ ኢትዮጵያውያን የመገናኛ፣ የስፖርት፣ የባህልና የአንድነት ልዩ መድረክ የሆነው ይህ ፌስቲቫል፣ ከተለያዩ የአውሮፓ ሀገራት ረጅም ርቀት ተጉዘው በመጡ ተሳታፊዎች ላይ በደረሱ አሳዛኝና ኢትዮጵያዊነትን በማይመጥኑ ተግባራት ተጠናቋል። በመጀመሪያ፣ በዚህ ፌስቲቫል ላይ ለመሳተፍ መጥታችሁ ላልተፈለገ እንግልት፣ ችግርና ከፍተኛ ወጪ የተዳረጋችሁ ተሳታፊዎቻችን በሙሉ፣ በ ESCFE ሥራ አስፈፃሚ ኮሚቴ ስም ከልብ ይቅርታ እንጠይቃለን። ለተፈጠረው ሁኔታም ሙሉ ኃላፊነት የምንወስድ መሆኑን እናሳውቃለን። ፌዴሬሽኑ ፌስቲቫሉ ከመካሄዱ ወራት አስቀድሞ፣ የግል ጥቅማቸውን በሚያሳድዱ የተደራጁ ግለሰቦች የተፈጠሩ በርካታ ተግዳሮቶችን ሲያስተናግድ ቆይቷል። ሆኖም ፌዴሬሽኑ ይህንን ታላቅ የኢትዮጵያውያን መገናኛ መድረክ ከመሰረዝ ይልቅ፣ ችግሮችን በትዕግሥትና በሆደ ሰፊነት ተቋቁሞ ለማካሄድ መርጧል። ይህን ውሳኔ የወሰድነው፣ ብዙ ተሳታፊዎች የትራንስፖርትና የሆቴል ወጪያቸውን አስቀድመው በማውጣታቸው፣ የዕረፍት ጊዜያቸውንም ለዚህ መርሃ ግብር በመገኘት ለማሳለፍ አስቀድመው በማስተካከላቸው፣ እንዲሁም ፌስቲቫሉን በጉጉት ሲጠብቁ የነበሩ ታዳጊዎችና ወጣቶችን ከግምት ውስጥ በማስገባት ነው። ሆኖም ግን፣ ከአዘጋጁ ኢትዮ ሮማ ተወካይ ጀምሮ በግልም ሆነ በቡድን የተደራጁ ሌሎች አካላት ዝግጅቱ እንዲበላሽ፣ ተሳታፊዎቻችን የበለጠ እንግልት እንዲደርስባቸው ያደረጉ በርካታ ክስተቶችን ፈጥረዋል። ከእነዚህም መካከል ደረጃውን ያልጠበቀና ለዚህ ዓይነት ዝግጅት የማይመጥን ቦታ መምረጥ፣ የፌዴሬሽኑን ፕሬዚዳንትን ጨምሮ የስራ አስፈፃሚ ኮሚቴ አባላትን ስራቸው በአግባቡ እንዳያከናውኑ የስራ እገታ ማድረግ፣ የመብራትና የውሃ አገልግሎቶች ማቋረጥ እና በዚህም አገልግሎት ሰጪዎችንና ተሳታፊዎችን ማሳዘን ይገኙበታል። በተጨማሪም፣ “አርቲስቶች ክፍያ አልተፈጸመላቸውም” የሚሉና ሌሎችም ከእውነት የራቁ አሉባልታዎችን በማሰራጨት የፌዴሬሽኑን ስም ለማጥፋት የተደረጉ ጥረቶች ኢትዮጵያዊነትን በማይወክል መልኩ የተፈፀሙ አሳዛኝ ተግባራት ናቸው። በተለይም ለዚህ ፌስቲቫል ከተለያዩ የአውሮፓ አገራት ረጅም ርቀት ተጉዘው የመጡ ወገኖቻችን የገጠማቸው እንግልትና ኪሳራ በቀላሉ የሚታለፍ አይደለም። ፌዴሬሽኑ ሕጋዊ እውቅና ያለው፣ ገቢና ወጪውን በኦዲት የሚያስመረምር፣ ከማንኛውም የፖለቲካ ተቋም ነፃና ገለልተኛ ሆኖ ሁሉንም ኢትዮጵያውያን ለመወከልና ለማገልገል የቆመ ተቋም ነው። ሆኖም ግን “እኛ ብቻ እንወስናለን” በሚል አስተሳሰብ በተደራጁ ግለሰቦች የፌዴሬሽኑን ሕጋዊና ተቋማዊ ሥርዓት ለማፍረስና ለማዳከም የተደረጉ ጥረቶች ሁላችንንም ያሳዘኑ ክስተቶች ሆነው አልፈዋል። ከሰሞኑም ፌዴሬሽኑን ለማጥላላትና ስሙን ለማጥፋት በቲክቶክና በሌሎች የማኅበራዊ ሚዲያ መድረኮች የተከፈተውን የስም ማጥፋት ዘመቻ በጥንቃቄ እየተከታተልን ነው። ሆኖም ፌዴሬሽኑ ከማንኛውም ግለሰብ ወይም ቡድን ግላዊ ጥቅም በላይ የኢትዮጵያውያንን አንድነት፣ ባህልና የጋራ ጥቅም በማስቀደም ሥራውን በቁርጠኝነት ይቀጥላል። ፌዴሬሽኑ በቀጣይ የሥራ አስፈፃሚ ኮሚቴውን አስቸኳይ ጉባኤ በመጥራት፣ በፌስቲቫሉ ዙሪያ የተከሰቱትን ሁሉንም ጉዳዮች በግልጽነት እንደሚመረምር፣ እውነታውንም በመረጃ አስደግፎ ለሕዝብ ይፋ እንደሚያደርግ እናሳውቃለን። በመጨረሻም፣ ይህ ፌስቲቫል የአንድ ግለሰብ፣ የአንድ ቡድን ወይም የአንድ አካባቢ ንብረት አይደለም። የ21 ዓመታት ታሪክ ያለው የኢትዮጵያውያን የጋራ መድረክ ነው። ይህንን ታላቅ ተቋም ከግል ጥቅም፣ ከመከፋፈልና ከግጭት በላይ በማስቀመጥ፣ ለቀጣይ ትውልድ እንዲተላለፍ ሁላችንም የየራሳችንን ኃላፊነት እንድንወጣ እንጠይቃለን። እውነት በጊዜው ይገለጣል፤ ሕዝብም በእውነታው ይፈርዳል! በአውሮፓ የኢትዮጵያውያን የስፖርትና ባህል ፌዴሬሽን የስራ አስፈፃሚ ኮሚቴ

በበዓሉ ሳምንት የሚደረጉ የኮንሰርት እና የባህል ዝግጅቶች ከ ESCFE ጋር በሚኖር ስምምነት ብቻ መሆን ይኖርበታል። ሙሉ ደብዳቤውን ከታች ይመልከቱ።

ከህግ ክፍል የተሰጠ ጥብቅ ማሳሰቢያ Strict warning from the legal department. Avviso severo da parte dell’ufficio legale. Amharic ይፋዊ ማስታወቂያ — ESCFE Rome 2026 ከጁላይ 27 እስከ ኦገስት 1፣ 2026 በሮም በሚካሄደው ኦፊሴላዊ የ ESCFE ዝግጅት ወቅት፣ ማንኛውም ኮንሰርት፣ ፓርቲ፣ ሽያጭ ወይም ፕሮግራም ያለ ESCFE የጽሁፍ ፈቃድ ከዝግጅቱ ጋር ማቅረብ አይችልም። ለመተባበር ወይም ለማንኛውም ጥያቄ፣ እባክዎ የ ESCFE ኦፊሴላዊ ተወካዮችን ብቻ ያነጋግሩ። #ESCFERome2026 English OFFICIAL NOTICE — ESCFE Rome 2026 During the official ESCFE event in Rome (27 July – 1 August 2026), no concert, party, sale or program may present itself as connected to ESCFE Rome 2026 without prior written authorization. For any collaboration or inquiry, please contact ESCFE’s official representatives only. #ESCFERome2026 Italian COMUNICAZIONE UFFICIALE — ESCFE Rome 2026 Durante l’evento ufficiale ESCFE a Roma (27 luglio – 1 agosto 2026), nessun concerto, festa, vendita o programma può presentarsi come collegato a ESCFE Rome 2026 senza autorizzazione scritta. Per qualsiasi collaborazione o richiesta, contattare esclusivamente i referenti ufficiali della ESCFE.

የ2025 የክብር እንግዳችን የነበሩትን ኢንተረናሽናል አርቢትር ጋሽ ጌታቸው ገ/ማርያም ባደረባቸው ህመም ከዚህ ዓለም በሞት ተለይተዋል። ESCFE በመላው የስፖርት ቤተሰብና በኢትዮጵያውያን ስም ሀዘኑን እየገለፀ ለቤተሰቦቻቸውና ለሁሉም ኢትዮጵያዊ መጽናናትን ይመኛል። ከስር ባለፈው ዓመት በዚሁ በገጻችን ላይ አስፈረነው የነበረውን እነሆ። የማይደፈረው ዳኛ ጌታቸው ገ/ማርያም ያልተከፈለው የ60 ዓመት አገልግሎት የ20ኛ ዓመት የፌዴሬሽናችን ክብረ በዓል ላይ በኢትዮጵያ እግር ኳስ ታሪክ ውስጥ ስማቸው በደማቁ የታሪክ ማህደር ላይ ተፅፎ የሚገኘውን ለ60 ዓመታት ያህል ከተጫዋችነት እስከ ኢተርናሽናል አልቢተርነት ከኮሚሽነርት እስከ ፌዴሬሽን ፕሬዝዳኝት በማገልገል በስፖርት ቤተሰቡ ዘንድ በክብር የሚታወሱትን ኢንተርናሽናል አልቢትር ጋሽ ጌታቸው ገ/ማርያምን የክብር እንግዳችን አድርገን የጋበዝን መሆኑን ስንገልፅ ኩራትም ክብርም ይሰማናል ። ጋሽ ጌታቸው የእግር ኳስ ሕይወታቸው የሚጀምረው ከኦሜድላ ክለብ ሲሆን ድንቅ የተከላካይ መስመር ተጫዋች ነበሩ ። ከኦሜድላ ቀጣይ ክለባቸው አንጋፋው የድሬደዋው ጨርቃጨርቅ ክለብ ሲሆን በወቅቱ ማለትም 1953 ኢትዮጵያ ባዘጋጀችው እና ብቸኛው ሻምፒዮን መሆን በቻለችበት 3ኛው የአፍሪካ ዋንጫ ከተመለመሉት 35 ተጫዋቾች ውስጥ የተካተቱ ሲሆን ቡድኑም የ3ኛውን አፍሪካ ዋንጫ ሲያነሳ ቤተመንግስት ተጋብዘው ከቀዳማዊ ሃ/ስላሴ ሽልማት ወስደዋል ። ጋሽ ጌታቸው ወደ ዳኝነቱ ሙያ እንዴት እንደገቡ ሲገልፁ ከድሬደዋ ጨርቃ ጨርቅ ከሉቻኖ እና መንግስቱ ወርቁ ጋር የአሰልጣኝነት ኮርስ ለመውሰድ ነበር የመጣሁት ግን በሚያስገርም ሁኔታ “ጋሽ ይድነቃቸው ወደ እኔ መጥቶ አንተ አሰልጣኝ ሳይሆን ዳኛ ነው መሆን ያለብህ አለኝ” ይላሉ የዳኝነት ስልጠናየን የጨረስኩት ቶሎ ቶሎ ነው 1ኛ 2ኛ እና ፌዴራል ዳኛ የሆንኩት በፍጥነት ነው ይላሉ ። 1957 ካይሮ ላይ ግብፅ እና ቱኒዚያን በማጫወት የጀመረው ኢንተርናሽናል አርቢትርነት ሕይወቴ ለመቁጠር የሚከብዱ በየሀገሩ እየተዘዋወርኩ በርካታ ጨዋታዎችን በብቃት በመወጣት የሀገሬን ባንዲራ ከፍ ብሎ እንዲውለበለብ አድርጌያለው ይላሉ ። አልቢትር ጋሽ ጌታቸው ሙያቸውን እና ስፖርቱን በንፅህና እና በታማኝነት ማገልገላቸውን ብዙዎች ይመሰክሩላቸዋል ። ሀማሴን እና ኤሌትሪክን አስመራ ላይ ባጫወትኩበት ወቅት የሀማሴን ክለብ አመራሮች 30ሺ ብር እንስጥህ ብለውኝ የነበረ ሲሆን እኔ ግን ብሩ በወቅቱ ብዙ የነበረ ቢሆንም አላታለለኝም ጋሽ ይድነቃቸውም የጨዋታውን ሪፖርት ሲያይ ከልብ ኮርቶብኛል ሲሉ አጫውተውናል አልቢትር ጋሽ ጌታቸው በዳኝነት ዘመናቸው ሁሌም የተሰጣቸውን እምነትና ሀገራዊ ሃላፊነት በብቃት በመወጣት ከራሳቸው አልፈው ሕዝባቸውን ያኮሩ ባንዲራችን ከፍ ብላ እንድትውለበለብ የድርሻቸውን የተወጡ ድንቅ የሙያው አባት ናቸው ። የሞቃድሾው ጨዋታ ውጥረት ወቅቱ 1968 ነው ኢትዮጵያ እና ሶማልያ ወደ ጦርነት የገቡበት ከባድ ወቅት ቢሆንም ፊፋ ግን እኔን በመሃል ዳኝነት ሶማልያ ከኒጀር ሞቃድሾ ላይ እንዳጫውት መረጠኝ ሁኔታው ለደህንነቴ አስጊ ስለሆነ ጋሽ ይድነቃቸው ከወቅቱ የውጭ ጉዳይ ሚንስትር ኮረኔል ጎሹ ወልዴ ጋር በመሆን ሁኔታውን ለፕሬዝደንት መንግስቱ ሃ/ማርያም ቀርበን ያስረዳን ቢሆንም ምንም ነገር መፍጠር አልቻልንም ። የኔ ከጨዋታው መቅረት እኔም ላይ ሆነ ኢትዮጵያ ላይ የፊፋ ቅጣት ያስከትልብናል ስለዚህ ሳልወድ በግዴ ሞቃድሾ ሄጄ አጫወትኩ ይላሉ ። በወቅቱ ሶማልያ ውስጥ የኢትዮጵያን ባንዲራ እየረገጡ የሚጨፍሩ ደጋፊዎች ባይም እኔ ግን ባንዲራዬን ሳይወዱ በግዳቸው በክብር ተሰቅሎ እንዲውለበለብ አድርጌያለው በማለት ትዝታቸውን አጋርተውናል ። ደፋሩ እና ኮስታራው አልቢትር ጌታቸው ገ/ማርያም ትልቁን የኢትዮጵያ ደርቢ ጊዮጊርጊስ ከ መቻል የፍፃሜ ጨዋታ ለ5 ተከታታይ አመታት በብቸኝነት እና በብቃት እንዳጫወቱ ታሪክ ይዘክራል ። ከዳኝነት ሲሰናበቱም ላበርክቶዋቸው በ1986 በብቸኝነት የእድሜ ልክ የስታድየም ነፃ መግቢያ ከእግር ኳስ ፌዴሬሽኑ ተበርክቶላቸዋል ። አልቢትር ጋሽ ጌታቸው ዳኝነት ካቆሙ በዋላም ቢሆን በበርካታ ሃላፊነት ቦታዎች እስከ 2009 ድረስ ስፖርቱን በፅናት አገልግለዋል ። በኮሚሽነርነት በርካታ ዓመታትን የአዲስ አበባ እግር ኳስ ፌዴሬሽን ፕሬዝደንት የጠቅላይ አርቢትር ኮሚቴ ሰብሳቢ የኢትዮጵያ እግር ኳስ ፌዴሬሽን ስራ አስፈፃሚ አባል ነበሩ።