Ethiopian Sport & Culture Federation in Europe
በአውሮፓ የኢትዮጵያውያን የስፖርትና ባህል ፌዴሬሽን
ለመሪው ሕሊና ለሕዝቡም ልቦና፤
የፍጡራን ሁሉ የበላይ አምላክ ለአገራችን ሰላም፣ መረጋጋትና ብልፅግና፤
ለመሪዎች መልካም ሕሊና፤ ለሕዝባችን በአንድነትና በጋራ የመኖርን ልቦና
ይስጥልን።
ምን ይባል አሁንስ ምን ያለ ፈተና፣
ራቁት ተኩኖ ኑሮ በጎዳና፣
ልቦናው ተሰርቆ በድኑን ቀረና፣
ጭንቅላት ባዶ ሆኖ ታውሮም ህሊና፣
ሰብዓዊነት ጠፍቶ የሰው ዘር ረከሰ በክኖ ቀረ መና።
አይ መከራ ስቃይ የመጣብን ጣጣ፣
ወረርሽን የሚባል ገብቶብን ፈንጣጣ፣
ሰብዓዊነት ጠፋ ድቆሳው ቅጥ አጣ።
የተከበረው ሰው ከሰው ዘር የወጣ፣
ሆኖ ይታያል ዛሬ ዋጋ የማያወጣ።
ክብር የለሽ ሆኖ ያነሰም ከፌንጣ፣
ሆኖ ይታያል ዛሬ ዋጋ የማያወጣ።
አንዱ ዘመን ሄዶ ሌላኛው ሲመጣ፣
ስናስብ ቀናውን መልካሙ እንዲመጣ፣
እንዳለመታደል ሆኖም ዕድል ዕጣ፣
በወሬ ሽንገላ ነገሩ የለበጣ፣
ተስፋ አስቆራጭ እንጂ የተሻለ አልመጣ።
ይህ ሆንዋል ዘመኑ ዘመነ ፈጣጣ፣
ፍርድ ገምድልነት እጅግ አይን ያወጣ፣
እኔ ያልኩ ካልሆነ የፈለገው ይምጣ፣
ከሰውነት ባህሪ ፤በእጅጉም የወጣ፣
ማንንም ማይጠቅም ክፋት ነው የመጣ።
ምስክር ሆነናል ካለፈው ከጥንቱ፣
ድካማ ሆኖ ታይቷል የነበረው ብርቱ፣
ለጊዜያዊ ደስታ ተኩራርቶም በሐብቱ፣
ህሊናው ተጋርዶ ክዶት ሰውነቱ፣
ለሆዱ ያደረ ሆኖ ባዶ ከንቱ፣
ማየትም ተስኖት ያለውን ከፊቱ፣
እርቃኑንም ቀርቷል ቱጃር ባለሃብቱ።
በመጨረሻም ላይ እንምከር በእውነቱ፣
ይበጃል ለሁሉም ዞሮ መመልከቱ፣
በምንም መለኪያ ቢሆንም መስፈርቱ፣
መከበር አለበት ሰው በሰውነቱ።
በእጅጉ ሲበዛም ማር ይመራልና፣
ከልብ ካለቀሱ እንባ አይገድምና፣
ሁሉን ተቻችሎ ለማለፍ ፈተና፣
ለህዝቡ ልቦናን ለመሪም ሕሊና፣
አምላክ ያድርግልን ሁሉም ይሁን ቀና።
ኃይላችን ሕብረታችን ነው!

በሕብረትም ነገን የተሻለ ማድረግ ይቻላል፤፤
አቶ ዮሐንስ መሰለ በአውሮፓ የኢትዮጵያውያን የስፖርትና ባህል ፌዴሬሽን ሊቀመንበር